Tónlistarupplifun

Tónlist hefur fylgt manninum frá örófi alda. Í sögunni um Davíð og Sál konung í Biblíunni má lesa að tónlist hafi verið notuð sem meðferð við sálrænum kvillum. Pýþagóras og Aristóteles litu á tónlist sem forvörn fyrir geðheilbrigði. Fræðingar segja að tónlist geti haft jákvæð áhrif á vefi líkamans og sálina, hún hefur jákvæð áhrif á heilastarfsemina, auki vellíðan og dragi úr kvíða. Upplifun á tónlist fer eftir tíma, stað, menningu, uppeldi og félagslegu samhengi.

Tónlist á Hæfingarstöðinni er notuð með það að markmiði að auðga líf þjónustunotenda með tónlistarþátttöku og hlustun. Það er þó hvorki um að ræða tónlistarmeðferð né tónlistarkennslu. Leitast er við að auka vellíðan þjónustunotenda og efla félagslega samveru. Í gegnum tónlist gefst tækifæri til að upplifa, njóta og skapa.

Markmiðið er að finna hvar tónnæmi þjónustunotandans er best, hvaða hljóð eða hljóðgjafi vekur mest til finningaleg viðbrögð og veita þar með tækifæri á innihaldsríkri tónlistarupplifun. Tónnæmi er tilfinningaleg við viðbrögð við tónáreiti.

Líkaminn getur skynjað tónlistina. Á svokölluðum rithma-bekk er tónlist upplifuð í gegnum líkamann. Titringurinn frá tónlistinni fer í rithmabekkinn og þjónustunotandinn finnur fyrir tónlistinni í líkamanum. Þar með eflir hún líkamsvitund einstaklingsins. Þegar spilað er á hljóðfæri virkjar einstaklingurinn líkamann og líkamsskynjunin fer af stað. Auðveldlega er hægt að aðlaga staðsetningu hljóðfæra þannig að það henti líkamlegri færni hvers og eins að spila á hljóðfærin. Geta því allir spilað tónlist, það þarf eingöngu að hafa jákvæðan hvata.

Félagsleg samvera er efld í gegnum tónlist. t.d. með því að þjónustunotendur og þjálfi spila saman á hljóðfæri, skiptast á að spila á hljóðfæri fyrir hvert annað og hlusta saman á tónlist. Í gegnum tónlistarstundina skapast aðstæður fyrir þjónustunotandann og þjálfa til að eiga í öðruvísi samskiptum en vanalega og að eiga skemmtilega stund saman. Boðskipti styrkjast því þjálfinn fylgist vel með þeim áhrifum sem tónlistin hefur á þjónustunotandann og bregst við þeim boðskiptum sem þjónustunotandinn sýnir. Þjálfinn er vakandi fyrir hreyfingum líkamans, augum, andliti, andardrætti og fylgist með hvort þjónustunotandinn sýni merki um gleði, óöryggi eða aðrar tilfinningar. Með því að skoða boðskiptin má öðlast þekkingu á því hvað hver og einn þjónustunotandi vill og hefur gaman af. Tengsl milli einstaklinga styrkjast og eftir því sem næmni þjálfans fyrir boðskiptum þjónustunotandans eykst því markvissari verða boðskiptin.

Að skapa tónlist er tjáning án orða.